ᐅᒋᒪᐤ ᑕᐛᐅᒋᐛᐱᒡ • Hudson Bay Company
1831 ᐱᐳᓐ ᐊᑯᑕ ᐅᔅᑲᒡ ᑲᓂᔅᑯᐛᑲᓄᒡ ᓇᔅᑲᐱ ᐃᔪᒡ ᐛᒥᔅᑎᑯᓱᐛ ᐊᓐᑕ ᑲᒋᒥᑕᑲᓄᒡ ᐅᒋᒪᐤ ᑕᐛᐅᒋᐛᑉ Hudson Bay ᐊᓐᑕ ᑈᑦ ᒐᐃᒧᐤ Fort Chimo᙮
ᐊᓐᒡ ᓇᔅᑲᐱ ᑭᔭ ᐅᒋᒪᐅᒡ ᐊᓐᑕ ᑕᐛᐅᒋᐛᐱᒡ ᐊᑲ ᓱᑲ ᐅᒡ ᒥᔪᐱᑐᒡ᙮ ᐊᓐᒡ ᓇᔅᑲᐱ ᐃᔪᒡ ᑲᔭᐃᒥᐅᒡ ᒐᒋ ᐅᔅᑲᒡ ᐃᓯᐱᒧᑕᒡ ᒐᒋ ᑕᐛᒐᒡ ᐊᓂᔭ ᐛᐱᔅᑕᓐ ᒪᓂᐅᓇ ᐊᓐᑕ ᐸᐳᒋ ᑭᔭ ᒐᒋ ᑐᑕᒡ ᐊᓯᑯᒻ ᐳᓇ ᒐᒋ ᓂᐸᑕᒐᒡ ᐊᓂᔭ ᐛᐱᔅᑕᓇ ᑭᔭ ᑲᒥᒐᑎᑦ᙮ ᐊᓐᒡ ᓇᔅᑲᐱ ᐃᔪᒡ ᐊᑲ ᐅᒡ ᓇᓐᑎᒻ ᐊᓐᑐᒪᓂᒡ ᐊᓂᔭ ᒐᒋ ᑕᐛᒐᒡ ᐊᑯᐤ ᑕᐛᐅᒋᐛᐱᒡ ᐅᒋᒪᐤ ᐊᒋᑎᒥᒡ ᒋᐃᓯᒋᑕᐱᒪᐤ ᓇᔅᑲᐱ᙮
back to top
ᑲᐃᔅ ᐊᑎᐱᓇᓄᒡ • Major Moves
1831 ᐃᔅᐱᔅ 1956 ᐱᐳᓇ ᓇᔅᑲᐱ ᑕᑐᐎᒡ ᐊᓐᑕ ᑲᐊᑎᐱᒡ ᐊᑯᑕ ᐊᑲ ᐅᒡ ᓇᔅᒡ ᐅᔅᑎᑯᓂᒡ ᒐᒂᔪᐤ ᑲᐎᑕᐱᒋᑕᒡ ᑭᔭ ᒥᑯ ᑲᐃᓯᓇᒂᒡ ᐊᓇ ᑕᐛᐅᒋᐛᐱᒡ ᐅᒋᒪᐅᒡ ᒥᒄ ᐎᐃᐛᐤ ᑲᒥᔽᒋᒥᑎᓱᒡ᙮ ᒪᐤ ᑕᑐᐎᒡ ᑲᐸᒡ ᐊᑎᐱᓇᓄᒡ᙮
1842 ᐱᐳᓐ - ᑈᑦ ᒐᐃᒧᐤ ᑲᐃᔅ ᐊᑎᐱᓇᓄᒡ ᐊᓐᑕ ᑈᑦ ᓇᔅᑯᐱ
1870 ᐱᐳᓐ - ᑈᑦ ᓇᔅᑯᐱ ᑲᐃᔅ ᐊᑎᐱᓇᓄᒡ ᐊᓐᑕ ᑈᑦ ᒐᐃᒧᐤ
1915 ᐱᐳᓐ - ᑈᑦ ᒐᐃᒧᐤ ᑲᐃᔅ ᐊᑎᐱᓇᓄᒡ ᐊᓐᑕ ᐛᔅᑲᐃᓂᓯᒡ ᑈᑦ ᒪᑭᓐᓯᔾ
1948 ᐱᐳᓐ - ᑈᑦ ᒪᑭᓐᓯᔾ ᑲᐃᔅ ᐊᑎᐱᓇᓄᒡ ᐊᓐᑕ ᑈᑦ ᒐᐃᒧᐤ
1956 ᐱᐳᓐ - ᑈᑦ ᒐᐃᒧᐤ ᑲᐃᔅ ᐊᑎᐱᓇᓄᒡ ᐊᓐᑕ ᓴᐱᐸᐤ
ᑲᒥᓯᓇᑕᐃᑭᓄᒡ ᐃᒧᐅᓐ ᐅᒋᒪᐤ ᑕᐛᐅᒋᐛᑉ Hudson Bay Company ᑲᐊᑕᔭᒡ ᐊᓂᔭ ᓇᔅᑲᐱ ᒐᒋ ᑕᒪᒡ ᒐᒂᔪᐤ ᐊᓂᔭ ᓇᔅᑲᐱ ᑭᔭ ᒪᓂᐅᓇ ᑭᔭ ᐊᑲ ᐅᒡ ᔭᐃᒪᐃᑎᒥᑯᒡ ᐊᓐᑕ ᐊᔅᒋᒡ ᑲᐱᒡ ᐅᓴᒻ ᐊᓐᒡ ᓇᔅᑲᐱ ᑲᑎᑯᓂᒡ ᒐᒋ ᐊᓐᑐᓂᒪᓴᒡ ᑭᔭ ᐊᓐᑐᐅᒡ ᒐᒋ ᐱᑲᔅᒋᑎᓱᒡ ᑭᔭ ᒪᓂᐅᓇ ᑲᑕᒪᒡ ᐊᓂᔭ ᐅᒋᒪᐤ ᑕᐛᐅᒋᐛᐱᒡ Hudson Bay Company᙮ ᐊᓐᒡ ᐅᒋᒪᐅᒡ ᐊᑲ ᐅᒡ ᒥᔽᐃᑎᒺᒡ ᐊᓂᔭ ᓇᔅᑲᐱ ᐃᔪᐛ ᐊᑲ ᓱᑲ ᐅᒡ ᐊᓐᑐᒪᓄᐃᒋ ᑭᔭ ᐊᑲ ᐅᒡ ᐎᑕᒪᒡ ᐊᓂᔭ ᐸᔅᒋᑭᓐ ᓯᓂᔭ ᐊᔭᐱᒋᑕᐃᒋ ᐊᓐᑐᐅᐃᒋ ᑭᔭ ᐊᑯᑕ ᑲᓯᐛᐃᓇᓄᒡ ᒥᒐᑦ ᐊᐛᓐ ᑲᓂᐱᑦ᙮
back to top
ᐱᐳᓐ ᑲᐃᑎᔅᑕᒡ • 1940
1940 ᐱᐳᓐ ᑲᓐᑐᒪᓂᓇᓄᒡ ᐊᑕᐛᒐᓄᒡ ᒥᒐᑦ ᑲᓂᐱᒡ ᐊᐛᓐᒋ ᐊᑯᓱᐅᓐ ᑲᑎᒂᒡ ᑭᔭ ᐊᓐᑕ ᐊᑲ ᓱᑲ ᐅᒡ ᒥᒐᑎᑦ ᐊᓇ ᒧᓱᐛᐤ ᓯᐱᔾ ᐊᑎᒄ ᐊᑯᑕ ᑲᒪᑕᐃᑕᒡ ᓇᔅᑲᐱ ᐃᔪᒡ ᙮ ᐊᓐᒡ ᓇᔅᑲᐱ ᐃᔪᒡ ᐊᓐᑕ ᑲᐅᒡ ᐛᐎᒐᑲᓄᒡ ᐊᑐᐛ ᒋᓴᐅᒋᒪᑲᓂᒡ 1800 ᐱᐳᓐ ᑲᐱᒧᑯᑕᒡ ᒥᔅᑯᒡ ᐊᓐᑕ ᑲᐱᒧᑯᑕᒡ ᑲᓂᔅᑯᐛᒡ ᐊᑐᐛ ᒋᓴᐅᒋᒪᑲᓇ 1949 ᐱᐳᓐ ᑲᐃᑎᔅᑕᒡ ᑭᔭ ᐊᓐ Colonel H.M. Jones ᑲᑐᔅᑲᔅᑕᒃ ᒥᒋᒻ ᓱᓇᔭᔪᐤ ᐊᓐᑕ ᐊᑐᐛ ᑭᔭ ᐊᓇ M.Larviere Abitibi ᐃᔪᐤ ᑲᒋᓴᐅᒋᒪᐅᑐᔅᒐᑦ ᑲᐃᑐᑕᒡ ᐊᓐᑕ ᑈᑦ ᒐᐃᒧᐤ ᑭᔭ ᑲᐛᑎᔅᑕᑲᓄᒡ ᒐᒋ ᓯᒪᑲᓄᒡ ᑭᔭ ᒐᒋ ᐛᐎᒐᑲᓄᒡ ᓇᔅᑲᐱ ᐃᔪᒡ᙮
back to top
ᐱᐳᓐ ᑲᐃᑎᔅᑕᒡ• 1950
1950 ᐱᐳᓐ ᑲᐱᒧᑯᑕᒡ ᐊᓐᒡ ᓇᔅᑲᐱ ᑲᒋᑐᑕᒡ ᒐᒋ ᐊᓐᑕ ᑲᐤ ᐃᔅ ᐊᑎᐱᒡ ᐛᔅᑲᐃᑲᓂᓯᒡ ᑈᑦ ᒪᑭᓐᓯᔾ ᑭᔭ ᐊᓐᑕ ᓴᔅ ᑲᐎᒋᒡ 1916 ᑭᔭ ᐃᔅᐱᔅ 1948 ᐱᐳᓇ ᑭᔭ ᑲᐤ ᐊᓂᔭ ᑲᐅᒡ ᐱᑲᔅᒋᑎᓱᒡ ᑭᔭ ᐊᓐᑐᐅᒡ ᑭᔭ ᐊᓐᑐᒪᓂᔪᒡ ᐊᑕᐛᒐᒡ ᒪᓂᐅᓇ᙮ ᒋᒋᐛ ᐊᔭᐃᒥᔪᓇᓄᒡ ᐊᔅᐱᔅ ᐅᑎᒋᐱᐃᒡ ᒪᓂᐅᓇ ᒐᒋ ᑕᐛᒐᓄᐃᒋ ᑭᔭ ᐊᓐᑕ ᑲᐱᒻᐱᐃᒡ ᐊᑯᓱᐅᓐ ᐅᐱᓇᑯᓱᐅᓐ ᑭᔭ ᑯᑎᒋᔪᐤ ᐊᑯᓱᐅᓂᔪᐤ ᑭᔭ ᑲᐤ ᐊᓐᑕ ᑲᐊᑎᐱᒡ ᑈᑦ ᒐᐃᒧᐤ ᑲᒋ ᓂᓱᐳᓂᒡ᙮
back to top
ᑲᐃᑐᑕᓄᒡ ᐊᓐᑕ ᐅᑕᓇᒡ ᓴᐱᐸᐤ • Journey to Schefferville
ᐊᑲ ᓱᑲ ᓂᔅᑐᑕᒂᒡ ᓄᑎᒻ ᓇᔅᑲᐱ ᐃᔪᒡ ᑲᐃᔅ ᑲᐊᑎᐱᒡ ᑲᓂᑲᑕᒡ ᑈᑦ ᒐᐃᒧᐤ ᐊᓐᑕ ᑲᑎᐱᒡ ᓴᐱᐸᐤ 1956 ᐱᐳᓐ ᑭᔭ ᐊᓐᑕ ᓯᓂᔾ ᑲᒧᓇᐃᑲᓄᒡ ᓂᓱᐃᒡ ᐊᑕᐃᑕᑭᓄᒡ ᒐᒂᓐ ᑲᐅᒡ ᐊᑎᐱᒡ ᓇᔅᑲᐱ ᐃᔪᒡ ᑲᒋᓴᐅᒋᒪᐤᑐᔅᒐᐃᒋ ᑲᐃᑎᑯᒡ ᒐᒋ ᐊᑎᐱᒡ ᑭᔭ ᒪᑲ ᔭᐱᒡ ᐊᑕᐃᑕᑲᓄᒡ ᐊᓐᒡ ᐎᐃᐛᐤ ᓇᔅᑲᐱ ᑲᐎᔭᑎᐱᒡ ᒐᒋ ᒥᔪᐱᒪᑎᓯᒡ ᐊᑐᔅᒐᐅᓂᔪᐤ ᒐᒋ ᑲᓄᐛᐃᑕᒡ ᑭᔭ ᒥᒍᐛᐸ ᑭᔭ ᐊᑯᓱᐅᓂᒡ ᒐᒋ ᐛᐎᒐᑲᓄᒡ ᑭᔭ ᒐᒋ ᐊᔅᑯᑎᒧᐛᑲᓄᐃᒋ ᐅᑐᐛᔅᒋᒧᐛᐛ᙮
ᐊᑎᓱᒃ ᐊᓐᒡ ᐃᔪᐤ ᑲᒋᓴᐅᒋᒪᐅᑐᔅᒐᒡ ᑲᔅᒐᐃᑕᒡ ᐊᓂᔭ ᓇᔅᑲᐱ ᑈᑦ ᒐᐃᒧᐤ ᐅᒡ ᓴᐱᐸᐤ ᒐᐃᔅ ᐊᑎᐱᒋ ᒐᐃᓯᓇᑯᓂᐃᒡ ᐎᐃᐛᐤ ᑲᒋᓴᐅᒋᒪᐤᑐᔅᒐᒡ ᐊᑐᑐᐛᒡ ᐃᔪᐛ ᒐᒋ ᐊᑎᐱᐃᒋ ᑭᔭ ᐊᑲ ᓱᑲ ᐅᒡ ᒥᔪᔭᔅᑯᔅᑕᒡ ᒐᒂᔪᐤ ᐊᓐᑕ ᒐᑎᑯᓯᓂᒋ ᑭᔭ ᐊᑲ ᐅᒡ ᐎᑎᒧᐛᒡ ᐊᓂᔭ ᐊᑲᓇᐛ IOCC ᑭᔭ ᓴᐱᐸᐤ ᐅᑕᓇᔪᐤ ᐊᑕᐃᒋ᙮
ᓇᔅᑲᐱ ᑲᓂᑲᑕᒡ ᑈᑦ ᒐᐃᒧᐤ ᐊᓐᑕ ᑲᐱᒧᑕᒡ 400 miles ᐊᔅᐱᓴᐃᒡ ᐊᓐᑕ ᓴᐱᐸᐤ᙮ ᑲᐅᑎᑕᒡ ᐅᔅᒂᔅ Wakuach Lake ᓴᑲᐃᑲᓂᒡ᙮ 70 miles ᒋᐛᑎᓄᒡ ᐊᓐᑕ ᓴᐱᐸᐤ ᐱᔅᒐ ᒋᒋᐛ ᑲᔭᔅᑯᓯᒡ ᑭᔭ ᑲᐊᑯᓯᒡ ᑭᔭ ᑲᓯᐛᐃᒡ᙮
ᑲᓐᑐᐛᐱᒪᑲᓄᒡ ᑭᔭ ᑲᐛᐎᒐᑲᓄᒡ ᐊᓐᑕ ᑲᑕᒡ ᑲᔭᐃᒥᔪᒡ ᒥᔅᑯᒡ ᐊᓐᑕ ᒥᒍᐛᐸ ᑲᐎᒋᑕᒡ ᐎᐃᐛᐤ ᑲᐅᓯᑕᒡ ᐊᓐᑕ ᑲᒋᒥᑕᒡ ᒥᒋᒪ ᐃᔅᑯᑕᐅᑕᐸᓐ ᒪᔅᑲᓇᒡ ᑭᔭ ᑲᒥᔭᑲᓄᒡ ᒐᒂᔪᐤ ᒐᒋ ᐊᐱᒋᑕᒡ᙮ ᓇᓇᒐ 1957 ᐱᐳᓐ ᑲᐃᑎᔅᑕᒡ ᓂᐱᔾ ᑲᐎᓇᑲᒥᒡ ᐊᓐᑕ Knob Lake ᑭᔭ ᑲᐃᔅ ᐊᑕᔭᑭᓄᐅᒡ Lac John ᐊᓐᑕ ᒥᒋᒪ ᓴᐱᐸᐤ ᑲᑎᑯᓂᒡ 4 miles ᑭᔭ ᐊᑲ ᐅᒡ ᐛᐎᒐᑲᓄᒡ ᒐᒋ ᑎᑯᓂᒡ ᒥᒐᐳᔪᐤ ᐊᔅᐱᔨᒡ ᑭᔭ ᒪᒃ ᒐᒋ ᐛᔅᑕᓂᒧᐛᑭᓄᐅᒡ ᑭᔭ ᑲᐎᑐᑕᒡ ᒐᒋ ᐊᑐᒐᒡ ᐊᓐᑕ ᓴᐱᐸᐤ ᓇᒪ ᐅᒋ ᑎᑯᓂᔪᐤ ᔅᑯᑎᒪᑐᒋᐛᐱᔪᐤ ᒐᒋ ᔅᑯᑎᒧᐛᑭᓄᐃᒋ ᐅᑐᐛᓯᒧᐛᐛ ᑭᔭ ᐊᑲ ᐅᔅᑎᑯᓂᒡ ᐊᑯᓯᔪᒋᐛᐱᔪᐤ᙮
ᓇᔅᑲᐱ ᒪᒧ ᐊᓂᔭ ᑲᐎᒋᒪᒡ ᐛᓴᐤ ᐃᔪᐛ ᐊᓐᑕ John Lake ᐊᓐᑕ ᑲᐅᒋᐱᐃᒋ ᐛᓴᒡ ᑲᒋᔅᑕᑲᓄᒡ ᒪᒂᒡ ᐃᔅᑯᑕᐅᑕᐸᓐ ᒪᔅᑲᓇᔪᐤ 1950 ᐱᐳᓐ ᑲᐱᒧᑯᑕᒡ᙮
back to top
ᓴᐱᐸᐤ ᑲᑕᓄᒡ • Establishing a Presence in Schefferville
ᓇᔅᑲᐱ ᑲᐅᓯᑕᒡ ᐊᓂᔭ ᐎᒍᐛᐛ ᒥᔅᑯᒡ 1962 ᐱᐳᓐ ᑲᐃᑎᔅᑕᒡ ᐊᓐ ᐃᔪᐤ ᑲᒋᓴᐅᒋᒪᐤᑐᔅᒐᒡ ᓂᔅᑐᔪᐤ ᒥᒋᐛᐸ ᑲᒋᒥᑕᒡ ᒋᒋᒥᑕᐤ ᑭᔭ ᒪᒂᒡ ᓇᐤ ᒋᐅᓯᑕᑭᓄᐛ ᒥᒋᐛᐸ ᐸᐃᒄ ᓴᓯᑲᓐ $5,000 ᑲᑐᑕᒡ᙮
1969 ᐱᐳᓐ ᑲᐃᑎᔅᑕᒡ ᐊᓐ ᐃᔪᐤ ᑲᒋᓴᐅᒋᒪᑐᔅᒐᑦ ᑲᐱᔅᑎᓂᒪᑯᒡ ᓴᐱᐸᐤ ᐊᓂᔭ ᐊᔅᒋᔪᐤ ᐊᓐᑕ ᒥᒋᒪ Pearce Lake᙮ 1972 ᐱᐳᓐ ᑲᐃᑎᔅᑕᒡ 43 ᒥᒍᐛᐸ ᑲᒪᓂᑯᐛᑲᓄᒡ ᓇᔅᑲᐱ ᑭᔭ 63 ᐛᓴᐎᔪᒡ ᑲᒪᓂᑯᐛᑲᓄᒡ ᑭᔭ ᐱᔅᒐ ᓇᔅᑲᐱ ᑭᔭ ᐛᓴᐎᔪᒡ ᑲᐃᔅ ᐊᑎᐱᒡ ᐊᓐᑕ ᐃᔪᔅᒋᒡ ᐊᓄᒡ ᒪᑎᒪᑯᔅ ᑲᐃᓯᓂᑲᑕᒡ᙮ ᐊᑯᑕ ᐅᔅᑲᒡ ᐊᓐᑕ ᑲᐃᔅᐱᔅ ᒥᒐᑥᐤ ᑲᑎᐱᒡ ᓇᔅᑲᐱ ᑭᔭ ᑲᐎᑎᒧᐛᑲᓄᒡ ᐎᒍᐛᐛ ᐛᒪᓂᑲᓄᐃᒋ᙮ ᐊᓐᒡ ᐃᔪᐤ ᑲᒐᐅᒋᒪᑐᔅᒐᒡ ᑲᐃᑎᓴᐛᒡ ᐅᑯᐸᓇᒧᐛᐛ ᒐᒋ ᐛᐎᑎᒧᐛᐃᒋ ᐊᓐᑕ ᐃᔪᔅᒋᔾ ᐛᑐᑕᑲᓄᒡ ᑭᔭ ᑲᐛᐸᑎᔭᑲᓄᒡ ᒐᐃᔅᓇᑯᓂᒋ ᐎᒍᐛᐛ ᑭᔭ ᐊᑎᑯᑕᒡ ᐃᒧᐅᓐ᙮ ᓇᔅᑲᐱ ᒥᒍᐛᐸ ᑎᐸᓐ ᒐᒋ ᒋᒥᑕᐃᒋ ᑲᐃᔅ ᓂᑐᐛᐃᑕᒡ ᑭᔭ ᒥᔅᑯᒡ ᐊᓐᒡ ᐃᔪᒋᒪᑲᓐ ᒪᒧ ᐊᑕᐱᑐᒧᐃᒋ ᒥᒍᐛᐸ ᑲᓇᐊᐃᑕᒡ ᒐᒋ ᒪᓂᑲᓄᐃᒋ ᒥᔅᑯᒡ ᒐᒋ ᒥᔪᐛᓯᑕᑲᓄᐃᒋ ᒐᐊᑲ ᓱᒋᐸᑕᑯᓯᒡ ᐊᐛᓐᒋ ᐊᓐᑕ ᒥᒋᒪ ᐛᒋᒪᑲᓄᒡ ᑭᔭ ᓇᒪ ᐅᒡ ᐃᓯᓇᑯᑕᑭᓄᐃᐛ ᒐᐊᑲ ᐸᑕᑯᓯᒡ ᐊᐛᓐᒋ ᒂᔅᑕᒐ ᐛᒋᒡ᙮
back to top
ᒥᒍᐛᐸ ᑲᐃᔅᒋᒥᑕᐃᒋ ᑭᔭ ᐊᑲ ᐅᔅᑕᒡ ᒥᔅᑎᑯᒡ • Row Houses without Trees
ᒥᒐᑦ ᒐᒂᔪᐤ ᓇᒪ ᐅᒡ ᓇᓴᒧᒡ ᐊᓐᒡ ᐃᔪᐤ ᑲᒐᐅᒋᒪᑐᔅᒐᒡ ᒋᐸᐃᓯᓇᑯᓂᐱᓂ ᒥᒋᐛᐸ᙮ ᐊᓐᑕ ᔭᐱᒡ ᑲᐃᑕᑲᓄᒡ ᒐᒂᔪᐤ ᒐᐎᑐᑕᑲᓄᐃᒡ ᓂᓱ ᒐᒂᐃᐛ ᐊᒋᑕᐸᑕᑲᓄᐃᒋ ᐊᑲ ᐅᔅᑐᑕᑲᓄᐃᒡ ᒧᔭᒻ ᒥᒍᐛᐸ ᑲᐎᓯᓇᑯᑕᑲᓄᐃᒋ ᑭᔭ ᐛᔅᑲ ᐊᔅᒋᔾ ᒐᒋ ᒥᔪᓇᑯᑕᑲᓄᒡ ᓇᒪ ᐅᒋ ᑐᑕᑭᓄᐤ᙮ ᐃᔪᐤ ᑲᒐᐅᒋᒪᑐᔅᒐᒡ ᒥᓯᓇᐃᑭᓂᔪᐤ ᑲᐛᐸᑎᐛᒡ ᐊᔅᒋᔾ ᒐᐃᐤ ᒥᔪᓇᑯᑕᑲᓄᐤ ᑭᔭ ᒐᒋ ᓂᑕᐅᒐᑲᓄᒡ ᒥᔅᑎᑯᒡ ᑭᔭ ᐛᔅᑲ ᒐᒋ ᒥᔪᓇᒂᒡ ᐃᔪᔅᒋᔾ᙮
back to top
ᒐᒋ ᑎᒂᒡ ᓱᒐᐃᑎᒧᐅᓐ ᑭᔭ ᔅᑕᐃᑎᒧᐅᓐ • Gaining Mutual Respect
ᑲᐃᔅᐱᐃᒡ ᒐᒂᓐ ᐊᓯᑲᔅᑕᐅᑯᒡ ᐊᐛᓐᒋ ᐊᓐᑕ ᐊᑐᔅᑲᔅᑕᒡ ᐃᔪᐤ ᒋᓴᐅᒋᒪᑲᓂᒡ ᒥᔅᑯᒡ ᐊᓐᒡ ᑲᒪᑕᐃᑕᒡ ᓇᔅᑲᐱ ᐃᔪᒡ ᐊᓐᑕ ᒪᒧ ᓴᔅ ᑲᐎᐅᒋᑐᔅᒐᒪᒡ ᐃᔪᐤ ᑲᒐᐅᒋᒪᑐᔅᒐᐃᒋ ᑭᔭ ᐊᓐᑕ ᐊᑲ ᐅᓐᒋᔅᒋᑕᒡ ᐊᓂᔭ ᑲᑐᑕᑯᒡ ᐅᒋᒪᐤ ᑕᐛᐅᒋᐛᐱᒡ Hudson Bay Company᙮ ᐊᑲ ᐅᒡ ᒥᔅᑲᑕᐃᑕᑲᓄᒡ ᑭᔭ ᐊᔅᑯ ᐊᓄᒡ ᐎᔭᐎᑕᑲᓄᒡ ᑲᐃᔅ ᒪᑕᐃᑕᒡ ᓇᔅᑲᐱ ᑭᔭ ᐊᔅᑯ ᐊᓂᔭ ᐊᔭᐱᑕᐃᑕᒡ ᓇᔅᑲᐱ ᑭᔭ ᐱᔅᒐ ᒐᒂᔪᐤ ᐊᔅᑕᐃᑕᒡ᙮
back to top
ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ • James Bay and Northern Quebec Agreement
ᒐᒂᓐ ᑲᐃᔅᐱᐃᒡ ᐊᓐᑕ 1975 ᐱᐳᓐ ᑲᐃᑎᔅᑕᒡ ᐊᓐᑕ ᓴᐱᐸᐤ ᑲᓂᔅᑯᐛᑲᓄᒡ ᒋᒥᔅ ᐱ ᑕᒂᐃᑭᓐ Billy Diamond ᑭᔭ ᐃᔅᒋᒪᐤ Charlie Watt ᑭᔭ ᐊᓐᒡ ᓇᔅᑲᐱ ᑲᐃᑕᐃᑕᒡ ᒐᒋ ᐊᑐᔅᑲᔅᑕᒡ ᒪᒧ ᐊᓇᒋᐱᔅᑕᑐᓇᓄᐃᒡ ᐊᓂᔭ ᑲᒥᓯᓇᑕᐅᑎᓱᓇᓄᐃᒡ ᐊᓂᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᓯᓇᐃᑭᓂᔪᐤ᙮
ᓇᔅᑲᐱ ᒪᒧ ᑲᒥᓯᓇᑕᐅᑎᓱᒡ ᓂᔅᑯᒧᐅᓂᔪᐤ NQIA ᐊᓐᑕ ᒐᒋ ᐛᐎᒐᑲᓄᒡ ᑲᐃᒥᒋ ᑭᔭ ᑯᑎᑲ ᑲᐛᐎᒐᐅᓯᒋ ᐊᓐᑕ ᒧᓂᔭᓂᒡ᙮ ᐊᓇ ᒐᒂᓐ ᑲᐛᑎᔅᑕᑲᓄᒡ ᐊᑲ ᐅᒡ ᐱᑯᑕᑭᓄᒡ ᒐᒂᓐ ᒥᔅᑯᒡ ᐊᓇ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ ᑲᒥᓯᓇᑕᐅᑎᓱᓇᓄᒡ ᐊᓐᑕ ᐱᓂᐎᐅᐱᓯᒻ 11,1975 ᑭᔭ ᐊᑲ ᐅᒋᔅᑎᒋᒪᑲᓄᒡ ᐊᓐᒡ ᓇᔅᑲᐱ ᐃᔪᒡ᙮
ᑲᒋᒪᒥᓯᓇᑕᐅᑎᓱᓇᓄᒡ ᐊᓇ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ ᐊᑯᑕ ᑲᔅᒐᐃᑕᑲᓄᒡ ᐊᓐᒡ ᐃᔅᒋᒪᐅᒡ ᑲᒥᔅᑎᓂᑐᐛᑕᒡ ᒐᒂᔪᐤ ᑭᔭ ᑲᐎᐱᑯᓴᐃᒧᒡ ᑭᔭ ᐊᑲ ᓱᑲ ᐎᔅᑎᒋᒪᒡ ᓇᔅᑲᐱ ᐃᔪᐛ ᓇᔅᑲᐱ ᑯᐸᓇᓯᒡ ᑲᑲᔅᑎᓇᒡ ᐊᐛᐃᐛ ᒐᒋ ᐛᐎᒋᑯᒡ ᑭᔭ ᑎᐸᓐ ᑲᐃᔅ ᐱᒧᑕᒡ ᑭᔭ ᑲᑐᔅᑲᔅᑕᑎᓱᒡ᙮
ᐊᓐᒡ ᐊᐛᓐᒋ ᑲᒥᓯᓇᑕᐅᑎᓱᒡ ᐊᓂᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓂᔪᐤ ᑲᔅᒐᐃᑕᒡ ᐊᑯᑕ ᐊᑐᒡ ᒋᑎᑯᓂᔪᐤ ᐅᑎᐸᐃᑎᒧᐅᓄᐛᐤ ᓇᔅᑲᐱ ᐊᓐᑕ ᐊᒋᑕᐸᑕᑲᓄᒡ ᐊᔅᒋᔭ ᑭᔭ ᐊᑯᑕ ᑲᐎᓯᐱᒧᑕᓄᒡ ᒐᒋ ᓇᒋᐱᔅᑕᑐᓇᓄᒡ ᐊᓐ ᐊᒋᑕᐸᑕᑲᓄᒡ ᐊᔅᒋᔭ ᑎᐸᐃᑎᒧᐅᓇ᙮
back to top
ᓂᔅᑯᒧᐅᓐ ᑲᑐᑕᑲᓄᒡ ᑭᔭ ᑲᒥᓯᓇᑕᐅᑎᓱᓇᓄᒡ • Agreement-in-Principle
ᒥᔅᑯᒡ ᐊᓐᒡ ᓇᔅᑲᐱ ᐊᑲ ᓂᑕ ᐅᒡ ᑐᑕᒡ ᒥᓯᓇᐃᑭᓂᔪᐤ ᒐᒋ ᓇᓴᐊᒡ ᐊᓂᔭ ᑎᐸᐃᑎᒧᐅᓂᔪᐤ ᑭᔭ ᐊᓐᑕ ᒥᔅᑯᒡ ᑲᑐᑕᒡ ᐊᓂᔭ ᒥᓯᓇᐃᑭᓂᔪᐤ ᓇᔅᑲᐱ ᐊᐛᐎᔭᑲᓄᒡ ᐊᓂᔭ ᒥᓯᓇᐃᑭᓂᔪᐤ ᑲᑐᑕᒃ Alan Cooke ᑭᔭ ᐊᓐᒡ ᐊᐛᓐᒋ ᑲᒥᓯᓇᑕᐅᑎᓱᒡ ᐊᓂᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓂᔪᐤ ᑲᑲᔅᑎᓇᒡ ᐊᓂᔭ ᐅᑎᐸᐃᑎᒧᐅᓄᐛᐤ ᑭᔭ ᓴᓯᑲᓐ ᓂᔅᑯᒧᐅᓂᔪᐤ ᑲᑐᑕᒡ ᐊᓂᔭ ᒪᒧ ᓇᔅᑲᐱ ᐃᔪᐛ ᐊᓐᑕ ᑲᓯᑯᓂᒡ 1977 ᐱᐳᓐ ᑲᐃᑎᔅᑕᐃᒡ ᒐᒋ ᒪᒧ ᓇᒋᐱᔅᑕᑐᓇᓄᒡ ᒐᒋ ᑐᑕᑲᓄᒡ ᓂᔅᑯᒧᐅᓐ ᐊᓐᑕ ᒧᔭᒻ ᑲᐃᓯᐱᒧᑕᓄᒡ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓐ᙮ ᐊᑯᑕ ᐊᓇ ᑲᑐᑕᑲᓄᒡ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᑭᔭ ᐊᓐᑕ ᑲᒥᓯᓇᑕᐅᑎᓱᓇᓄᒡ ᐅᒐᒥᑐᓇᓂᐱᓯᒺ 31,1978 ᐱᐳᓐ ᑲᐃᑎᔅᑕᒡ᙮
ᐊᓇ ᐊᑭᔅᑭᑎᔅᑕᒡ 20 ᐊᑎᔅᑕᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ ᑲᒥᔭᑲᓄᒡ ᓇᔅᑲᐱ ᒐᒋ ᑎᐸᓐ ᐊᓐᑕ ᐊᑎᐱᒡ᙮
back to top
ᐊᑐᔅᒐᐅᓐ ᐊᒋᒥᑕᑲᓄᒡ - ᐛᓇᓴᐃᑲᓄᒡ ᒐᒋ ᑎᐸᐃᒥᑎᓱᓇᓄᒡ ᐊᓐᑕ ᒋᓴᐅᒋᒪᑲᓂᒡ •
Economic Development A Path to Self-government
1978 ᐃᔅᐱᔅ 1980 ᐱᐳᓐ ᑲᐃᑎᔅᑕᒡ ᑲᓇᑐᔅᒐᐃᑕᑲᓄᒡ ᐊᑐᔅᒐᐅᓐ ᑲᐃᔅ ᒋᒥᑕᑲᓄᒋ ᑲᑐᔅᑲᔅᑕᑲᓄᒡ ᐊᓐᑕ ᓇᔅᑲᐱ ᒐᐃᔅ ᐊᑎᐱᒡ᙮ ᐅᒐᒥᑐᓇᓂᐱᓯᒺ 31,1980 ᐊᓐᒡ ᓇᔅᑲᐱ ᑲᓇᐊᐃᑕᒡ ᒐᒋ ᐊᑎᐱᒡ ᐊᓐᑕ ᑲᐛᐛᒋᑲᒪᓯᒡ ᑲᐃᓯᓂᑲᑕᐃᒡ ᐃᔪᔅᒋᔪᐤ᙮ ᑲᐛᑎᔅᑕᑲᓄᒡ ᑭᔭ ᐊᓐᑕ ᒐᒋᒥᑕᑲᓄᒡ ᐃᔪᔅᒋᔾ ᐊᑯᑕ ᒐᐛᐎᒋᑯᒡ ᓇᔅᑲᐱ ᒐᒋ ᔅᑯᑎᒧᐛᑲᓄᒡ ᑕᑐᐎᒡ ᐊᓯᓇᑯᓂᒡ ᐊᑐᔅᒐᐅᓂᔪᐤ ᑭᔭ ᐊᒪᓂᒐᓄᐎᒡ᙮
1981 ᐃᔅᐱᔅ 1984 ᐱᐳᓐ ᑲᐃᑎᔅᑕᒡ ᐊᓇ ᒐᒋ ᑎᐸᐃᒥᑎᓱᓇᓄᒡ ᒋᓴᐅᒋᒪᑲᓂᒡ ᐊᓐᒡ ᑲᐃᔅᒋᔄᒡ ᐊᑐᐛ ᒋᓴᐅᒋᒪᑲᓂᒡ ᒐᑎᑯᓂᒡ ᐊᓐᑕ ᐊᑭᔅᑭᑎᔅᑕᐃᒡ 7 ᐊᑎᔅᑕᐃᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ ᑲᐛᐎᑕᑲᓄᒡ ᒪᒧ ᑲᓇᒋᐱᔅᑕᑐᓇᓄᒡ᙮ ᐊᓇ ᒐᒂᓐ ᑲᑐᑕᑲᓄᒡ ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᐃᓱᐛᐅᓐ ᑲᑐᑕᑲᓄᒡ ᐊᓐᑕ ᑲᐃᑎᓴᐃᑲᓄᒡ ᐊᑐᐛ ᒋᓴᐅᒋᒪᐤᒋᐛᐱᒡ ᐊᓐᑕ ᒍᓐᐱᓯᒺ 14,1984 ᐱᐳᓐ ᑲᐃᑎᔅᑕᒡ᙮
ᐊᓇ ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᐃᓱᐛᐅᓐ ᑲᑐᑕᑲᓄᒡ ᒐᒋ ᒥᔭᑲᓄᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᒡ ᒐᒋ ᐊᔭᑎᓐᑎᓱᒡ᙮ ᐊᓇ ᔭᐱᒡ ᒐᒋ ᑎᒂᒡ ᐊᑕᒡ ᐃᔪᒋᒪᑲᓐᒡ ᐊᓐᑕ ᑲᑐᑕᑲᓄᒡ ᐃᔪᐤ ᐃᑎᓱᐛᐅᓂᒡ ᑭᔭ ᐱᔅᒐ ᓱᒋᔪᐅᓐ ᐊᓐᒡ ᑲᑐᔅᑲᔅᑕᑲᓄᒡ ᐃᔪᐤ ᒋᓴᐅᒋᒪᑲᓂᒡ ᐊᓐᑕ ᐊᓇᓴᐃᑲᓄᒡ ᐃᔪᐤ ᐃᑎᓱᐛᐅᓐ ᐊᓐᑕ ᑲᐤ ᑲᐃᓱᐱᔅᑎᓂᒧᐛᑲᓄᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᒋᒪᑲᓐᒡ ᐎᐃᐛᐤ ᒐᒋ ᐊᑐᔅᑲᔅᑕᒡ᙮ ᐊᓐᒡ ᓇᔅᑲᐱ ᑭᔭ ᒋᒥᔅ ᐱ ᐃᔪᒋᒪᑲᓐᒡ ᔭᐱᒡ ᑲᒥᔭᑲᓄᒡ ᑎᐸᓐ ᓱᒋᔪᐅᓂᔪᐤ ᐊᓐᑕ ᐊᑲ ᒥᓯᓇᑕᐃᑲᓄᒡ ᐊᓐᑕ ᐃᔪᐤ ᐃᑎᓱᐛᐅᓂᒡ ᑭᔭ ᒧᔭᒻ ᐊᓐᑕ ᐊᓯᑲᓄᐛᐃᑕᑲᓄᐃᒡ ᐊᓐᑕ ᐅᑕᓇᐛ ᐅᑕ ᑲᓇᑕ᙮
back to top
ᑲᑐᔅᑲᔅᑕᑲᓄᒡ ᐊᑲᓇᐤ ᐊᑐᔅᒐᐅᓐ • Iron Ore IOC
ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᒪᒧ ᑲᓇᒋᐱᔅᑕᑐᓇᓄᒡ ᑲᒋᑕᐸᑕᑲᓄᒡ ᐊᓇ ᓴᐱᐸᐤ ᐅᑕᓇᐤ ᐊᔅᑯ ᒐᒋ ᐱᒥᐱᐃᒂ ᐊᑐᔅᒐᐅᓐ ᓯᓂ ᐛᒧᓇᐃᑲᓄᒡ ᑭᔭ ᑯᔅᒐᐅᒋᐛᑉ ᐊᑐᔅᒐᐅᓐ ᑭᔭ ᐊᓇᑐᐛᐸᑕᑲᓄᒡ ᓯᓂᔾ ᑲᐃᔅ ᒋᑕᐸᑕᑲᓄᒡ ᐊᓐᑕ ᓂᑲᓄᒡ᙮ ᑲᓇᑐᔅᒐᐃᑕᒡ ᐃᒧᐅᓂᔪᐤ ᑯᐸᒃ ᒋᓴᐅᒋᒪᑲᓐᒡ ᐊᓂᔭ ᐊᑲᓇᐛ IOC 1970 ᐱᐳᓐ ᑲᐃᑎᔅᑕᒡ ᐊᑐᔅᒐᐅᓐ ᐊᒋᑕᐸᑕᑲᓄᒡ᙮ IOC ᐊᑲᓇᐤ 1982 ᐱᐳᓐ ᑲᐃᑎᔅᑕᒡ ᐊᑯᑕ ᐊᑐᔅᒐᐅᓐ ᑲᒋᐸᐃᑲᓄᒡ ᐊᓐᑕ ᓴᐱᐸᐤ᙮
ᐊᓇ ᐊᑐᔅᒐᐅᓐ ᑲᒋᐸ ᐊᑲᓇᐤ ᐊᓐᑕ ᓴᐱᐸᐤ ᒥᒐᑦ ᒐᒂᓐ ᐊᓐᑕ ᑲᒪᑕᐃᑕᒂᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ ᑭᔭ ᐊᓐᑕ ᑲᐎᐛᐎᒋᐛᓄᒡ ᐊᑯᓱᐅᓐ ᑭᔭ ᐊᑐᔅᒐᐅᓐ ᒐᒋ ᔅᑯᑎᒪᑎᓱᓇᓄᒡ ᑭᔭ ᐊᑐᔅᒐᐅᓐ ᒐᒋ ᒋᒥᑕᑲᓄᒡ᙮ 1980 ᐱᐳᓐ ᑲᐃᑎᔅᑕᒡ ᐊᓐᒡ ᓇᔅᑲᐱ ᐃᔪᒋᒪᑲᓐᒡ ᑭᔭ ᐊᑐᐛ ᒋᓴᐅᒋᒪᑲᓐ ᒪᒧ ᑲᓇᑐᔅᒐᐃᑕᒡ ᐊᓂᔭ ᐊᑐᐛ ᑲᐃᔅ ᐱᔅᑎᓇᒃ ᐱᔅᒐ ᒐᒂᔪᐤ ᐊᓐᑕ ᑲᐃᓯᓇᑯᓂᒡ ᒐᒋ ᐛᐎᒋᐛᑦ ᐊᓐᑕ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓂᔪᐤ᙮ ᐊᓇ ᐊᓇᑐᔅᒐᐃᑕᑲᓄᒡ ᐃᒧᐅᓐ ᑲᑐᔅᑲᔅᑕᑲᓄᒡ ᐅᓴᒻ ᐊᓐᑕ ᓴᐱᐸᐤ ᑲᒪᑕᐃᑕᒡ ᓇᔅᑲᐱ ᑭᔭ ᐊᓐᑕ ᐊᑐᐛ ᐊᑲ ᐅᒡ ᑲᓄᐛᐃᑕᒃ ᐅᑎᐃᒧᐅᓐ ᐊᓐᑕ ᒐᐃᔅ ᐛᐎᒐᑦ ᓇᔅᑲᐱ ᐊᓐᑕ ᐊᒋᑕᐸᑕᑲᓄᒡ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓯᓇᐃᑭᓐ᙮
ᐊᓐᑕ ᑲᐃᑎᑯᑕᒡ ᒪᒧ ᑲᓇᒋᐱᔅᑕᑐᓇᓄᒡ ᐊᓇ ᑲᑐᑕᑲᓄᒡ ᑯᑎᒃ ᓂᔅᑯᒧᐅᓐ ᐊᒋᑕᐸᑕᑲᓄᒡ ᒐᒋ ᐊᑐᔅᑲᔅᑕᑲᓄᒡ ᐊᓇ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᐊᓐᑕ ᑲᒥᓯᓇᑕᐅᑎᓱᓇᓄᒡ ᐅᔅᑲᐅᐱᓯᒻ,1990 ᐱᐳᓐ ᑲᐃᑎᔅᑕᒡ᙮ ᑯᑎᒃ ᒐᒂᓐ ᐊᓇ ᓂᔅᑯᒧᐅᓐ ᑲᒋᒥᑕᑲᓄᒡ ᐊᓇ ᐃᔪᔅᒋᔾ ᐊᒋᑕᐸᑕᑲᓄᒡ ᒐᒋ ᐊᑐᔅᑲᔅᑕᑲᓄᒡ Capital Budget ᑭᔭ ᐊᑐᔅᒐᐅᓐ ᓱᓇᔭᐤ O/M Budget ᒐᒋ ᐱᒧᑯᑕᒡ ᐃᔅᐱᔅ ᐱᑕᑕᒡᑕᑐᐳᓇ ᑭᔭ ᑲᑐᑕᓄᒡ ᐊᓇ ᑕᑈᒧᐅᓐ ᒥᓯᓇᐃᑭᓐ ᒐᐃᓯᐱᒧᑕᓄᒡ ᐊᓐᑕ ᒐᒂᓐ ᐛᒋᐱᐃᒡ ᐊᓐᑕ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓯᓇᐃᑭᓂᒡ ᑭᔭ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓯᓇᐃᑭᓂᒡ ᑭᔭ ᓂᔅᑯᒧᐅᓐ ᐊᑐᔅᑲᔅᑕᑲᓄᒡ ᓂᔅᑯᒧᐅᓯᓇᐃᑭᓐ ᑭᔭ ᒐᒋ ᒋᒥᑕᑲᓄᒡ ᑲᒪᒧᐎᓇᓄᒡ ᒪᒧ ᒐᒂᓐ ᐊᑐᔅᑲᔅᑕᑲᓄᒡ ᒐᒋ ᐱᔅᑎᓇᑲᓄᒡ ᐃᒧᐅᓐ ᐊᑐᔅᒐᐅᓐ ᑭᔭ ᓇᔅᑲᐱ ᐃᔪᒡ ᐊᒋᑕᐱᒪᑲᓄᒡ᙮
back to top
.ᐊᒋᑕᐸᑕᑲᓄᒡ ᒥᓄᐛᒡ ᒐᐃᓯᐱᒧᑕᓄᒡ • Writing a New Chapter
ᐊᓐᒡ ᓇᔅᑲᐱ ᐊᓄᒡ ᐛᒋᒋᐱᑕᒡ ᐊᓂᔭ ᐊᑐᔅᒐᐅᓂᔪᐤ ᐛᔭᐱᒋᑕᒡ ᐊᓂᔭ ᐅᑎᔅᒋᐛᐤ᙮
ᐊᑐᔅᒐᐅᓐ ᐛᒋᒥᑕᑲᓄᒡ
• ᓴᐱᐸᐤ ᑥᐅᓇᓐ ᐊᑐᔅᒐᐅᓐ - ᐊᑐᔅᑲᔅᑕᒡ ᓇᔅᑲᐱ ᑲᒪᐅᑕᐱᐃᒡ ᓱᓇᔭᐤ ᑭᔭ ᐛᓴᐤ ᐃᔪᒡ
• ᒋᒥᔅ ᐱ ᒪᔅᑲᓄᐤ ᐊᑐᔅᑲᔅᑕᑲᓄᒡ - ᓇᔅᑲᐱ ᑲᒪᐅᑕᐱᐃᒡ ᑭᔭ ᓇᔅᑲᐱ ᐊᑐᔅᒐᐅᓇ ᑲᒻᐱᓂ
• ᓇᔅᑲᐱ ᐊᔅᒋᐅᒥᓯᓇᐃᑭᓐ - ᓇᔅᑲᐱ ᑲᒪᐅᑕᐱᐃᒡ ᓱᓇᔭᐤ ᑭᔭ ᓇᔅᑲᐱ ᐊᑐᔅᒐᐅᓇ ᑲᒻᐱᓂ
• ᒥᓇᐃᑯᒡ ᓂᒥᔅᒋᐅᔅᑯᑕᐤ ᐊᑐᔅᒐᐅᓐ - ᓇᔅᑲᐱ ᐛᔅᑕᐱᒪᑲᓐᒡ ᐊᑐᔅᒐᐅᓐ
• ᒥᒍᐛᐸ ᐊᐛᔅᑕᑲᓄᐃᒋ ᐊᑐᔅᒐᐅᓐ [ᓇᔅᑲᐱ ᐃᒧᐅᓐ ᑲᒻᐱᓂ - ᐃᒧᐅᓐ ᐊᒪᒧᔅᑕᑲᓄᒡ]
ᑕᑐᐎᒡ ᒐᒂᓐ ᐊᓐᑕ ᐛᒋᒥᑕᑲᓄᒡ ᑭᔭ ᒐᒋ ᒋᒋᐱᑕᑲᓄᒡ
• ᐊᑎᒄ ᐎᔭᔅ ᐛᑕᐛᒐᓄᒡ - ᓇᔅᑲᐱ ᐊᑎᒄ ᐎᔭᔅ ᑲᐱᓂ / ᓄᓇᐱᒃ ᒥᒋᒻ ᑲᒻᐱᓂ
• ᐊᓂᑐᑎᒂᓄᒡ ᑭᔭ ᐊᓐᑐᓂᒪᓴᓄᒡ ᑯᔅᒐᐅᒋᐛᑉ ᐊᑐᔅᒐᐅᓐ - ᓇᔅᑲᐱ ᑕᒃᑐ ᐊᑐᔅᒐᐅᓐ ᐊᓐᑕ
ᓇᔅᑲᐱ ᑲᒪᐅᑕᐱᐃᒡ ᓱᓇᔭᐤ᙮