ᒐᒋ ᐊᔭᔭᑎᓂᒪᑎᓱᓇᓄᒡ ᐊᑐᔅᒐᐅᓐ • Greater Responsibility
ᐊᑲ ᐅᒡ ᐃᓯᓇᒂᒡ ᒐᒋ ᑐᐎᔅ ᒥᔪᑯᑕᒡ ᑭᔭ ᒥᔪᔅᑕᒡ ᐊᓇ ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᓱᐛᐅᓐ ᑭᔭ ᓇᔅᑲᐱ ᐃᔪᒡ ᐊᓱᐛᐸᑕᒡ ᐊᑯᑕ ᐃᔪᒋᒪᑲᓐᒡ ᒐᒋ ᒥᒐᑦ ᐊᑐᔅᑲᔅᑕᒡ ᐅᑎᑐᔅᒐᐅᓄᐛᐤ᙮
ᒥᒄ ᐃᔪᒡ 700 ᐊᑕᑎᓯᒡ ᐊᓐᑕ ᐃᔪᔅᒋᒡ ᐊᑯᑕ ᒥᒐᑦ ᒐᒂᔪᐤ ᐃᔪᒋᒪᑲᓐᒡ ᐊᑐᔅᑲᔅᑕᒡ ᑭᔭ ᐛᑎᓇᒡ ᑲᐛᐎᒐᐅᓯᒋ ᒐᒋ ᐃᒧᐅᓂᔪᐤ ᐱᒧᑕᐃᒋ ᐊᓐᑕ ᒋᓴᐅᒋᒪᑲᓂᒡ ᒥᔅᑯᒡ ᐊᑎᑯᓂᒡ ᐊᓯᒋᓯᑯᐛᒡ᙮ ᐅᐛ ᐊᓯᓇᒂᒡ ᒋᑲᒋ ᒥᔅᑯᒋᐱᔪᐤ ᐊᓐᑕ ᓂᑲᓄᒡ ᑐᐎᔅ ᒥᒐᑎᑥᐛ ᐊᓐᒡ ᓇᔅᑲᐱ ᐃᔪᒡ᙮
ᐊᓐᑕ ᐊᑲ ᓴᐱᓇᒂᒡ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓂᒡ ᐊᓐᒡ ᐃᔪᒋᒪᑲᓐᒡ ᐊᓯᐱᒧᑕᒡ ᐊᓂᔭ ᐊᓯᒥᔭᒡ ᐊᐛᐃᐛ ᓱᒋᔪᐅᓂᔪᐤ ᑭᔭ ᒐᒋ ᐊᑐᔅᑲᔅᑎᒥᒋ ᒐᒂᔪᐤ ᑭᔭ ᐊᐱᒐᒡ ᑲᒪᒧᐎᓇᓄᐃᒋ᙮ ᒧᔭᒻ ᐃᔅᒋᔄᑕᐤ ᐊᑯᓱᐅᓐ ᐊᓄᒡ ᐊᑐᔅᑲᔅᑕᒡ ᐊᓐᒡ ᓇᔅᑲᐱ ᐊᑯᓱᐅᓂ ᑲᒪᒧᐎᓇᓄᒡ ᑭᔭ ᓂᑲᓄᒡ ᐊᓐᑕ ᒐᔭᔭᑎᓇᒡ ᓇᔅᑲᐱ ᐊᑯᓱᐅᓂᔪᐤ ᐊᓐᒡ ᐅᒋᒪᐅᒡ ᒐᒋᒥᔭᑲᓄᒡ ᒐᒋ ᐱᔅᑕᒡ ᐊᑯᓱᐅᓂᔪᐤ᙮ ᐊᔅᑯᑎᒪᑐᐅᓐ ᐊᓐᒡ ᐊᑐᔅᑲᔅᑕᒡ ᓇᔅᑲᐱ ᐊᔅᑯᑎᒪᑐᐅᓐ ᑲᒪᒧᐎᓇᓄᒡ᙮ ᐊᑐᔅᒐᐅᓐ ᐛᒋᒥᑕᑲᓄᒡ ᓂᓱᐎᒡ ᐊᑎᐸᓂᔅᑕᑲᓄᒡ ᐊᓐᒡ ᐊᑐᔅᑲᔅᑕᒡ ᐃᔪᒋᒪᑲᓐᒡ ᑭᔭ ᓇᔅᑲᐱ ᑲᒪᐅᑕᐱᐃᒡ ᓱᓇᔭᐤ ᑭᔭ ᐊᑯᑕ ᒋᒋᐛ ᐊᑐᔅᑲᔅᑕᑲᓄᒡ ᒐᒋ ᓇᑲᑐᐛᐃᑕᑲᓄᒡ ᐃᔪᐤ ᐃᔨᒧᐅᓐ᙮
back to top
ᐊᒥᓯᑎᒡ ᐃᔪᒋᒪᑲᓐᒡ ᒐᒂᔪᐤ ᐊᑐᔅᑲᔅᑕᒡ • An Expanded Council
ᒥᒐᑦ ᐊᑎᒂᒋ ᑎᐸᐃᑎᒧᐅᓇ ᑭᔭ ᑲᒪᒧᐎᓇᓄᐃᒋ ᒪᒧ ᐊᑐᔅᑲᔅᑕᑐᒡ ᐊᑯᑕ ᐊᑲ ᓱᑲ ᓴᐱᓇᒂᒡ ᐅᒋᒪᐅᓐ ᑭᔭ ᐊᑲ ᒥᔪᓇᒂᒡ ᐅᓴᒻ ᐊᓐᑕ ᐊᑲ ᓱᒃ ᒥᒐᑎᒡ ᐃᔪᒡ᙮ ᐊᑲ ᓱᑲ ᒥᒐᑎᒡ ᐊᐛᓐᒋ ᐊᓂᔅᑐᐛᐸᑕᒡ ᐊᑐᔅᒐᐅᓂᔪᐤ ᐊᓯᓇᑯᓂᒡ᙮ ᐊᑯᑕ ᒋᐸ ᒥᐛᐤ ᓄᑎᒻ ᒐᒂᔪᐤ ᐊᑐᔅᑲᔅᑕᒡ ᐃᔪᒋᒪᑲᓐᒡ᙮ ᐊᓐ ᐛᐸᑎᒧᐅᓐ ᐊᑎᒂᒡ ᐊᓇ ᐊᑐᔅᒐᐅᓐ ᐊᑐᔅᑲᔅᑕᑲᓄᒡ ᑭᔭ ᑲᑐᔅᒐᓯᒡ ᑭᔭ ᒐᒂᓐ ᔭᐱᒋᑕᑲᓄᒡ ᒐᒋ ᐊᑐᔅᑲᐛᒐᑲᓄᒡ ᐊᓐᑕ ᓄᑎᒻ ᐊᑎ ᐃᑎᒂᒋ ᑲᒪᒧᐎᓇᓄᐃᒋ ᑎᐸᐃᑎᒧᐅᓇ ᐊᑯᑕ ᒐᒋ ᒪᒧᔅᑕᑭᓄᒡ ᑭᔭ ᒧᔭᒻ ᐊᓐᑕ ᐊᑐᑕᑲᓄᒡ ᐊᑐᐛ ᒋᓴᐅᒋᒪᑲᓂᒡ ᑕᑐᐎᒡ ᐊᓐᑕ ᐊᑐᔅᑲᔅᑕᑯᒡ ᑯᐸᓇᓴ ᑭᔭ ᐊᑯᑕ ᒐᒋ ᐃᓯᐱᒧᑕᓄᐤ ᐃᔪᒋᒪᑲᓂᒡ ᑕᑐᐎᒡ ᒐᒂᓐ ᒐᒋ ᐊᑐᔅᑲᔅᑕᑲᓄᒡ ᒧᔭᒻ ᔅᑯᑎᒪᑐᐅᓐ ᑭᔭ ᐊᑯᓱᐅᓐ ᑭᔭ ᑲᐛᑕᔭᑦ ᐊᐛᓴ ᑭᔭ ᐊᑐᔅᒐᐅᓐ ᐛᒋᒥᑕᑲᓄᒡ ᑭᔭ ᐃᔪᐤ ᐃᑐᐅᓐ ᐊᑯᑕ ᒥᔅᑯᒡ ᓄᑎᒻ ᐃᒧᐅᓐ ᒋᐸ ᐊᓱᐱᔅᑎᓂᒧᐛᑲᓄᐅᒡ ᐃᔪᒋᒪᑲᓐᒡ᙮
ᐊᓐᒡ ᐃᔪᒋᒪᑲᓐᒡ ᐊᒥᔪᑯᑕᐃᒡ ᐱᔅᒐ ᒐᒂᔪᐤ ᑲᑐᔅᑲᔅᑕᒡ ᐊᓐᑕ ᓂᔅᑯᒧᐅᓐ ᐊᑐᔅᒐᐅᓐ ᔭᔭᑎᓇᑲᓄᒡ ᐊᓐᑕ ᑲᑐᑕᑲᓄᒡ ᑲᐤ ᑲᔭᑎᔅᑕᑲᓄᒡ ᐊᑯᓱᐅᓐ ᐊᑭᔅᑭᑎᔅᑕᒡ ᐸᐃᑯᔪᐤ [S.10 NEQA] ᐊᑎᔅᑕᒡ ᐊᓐᑕ ᓂᔅᑯᒧᐅᓯᓇᐃᑭᓂᒡ᙮ ᐊᑯᑕ ᐃᔪᒋᒪᑲᓐᒡ ᑲᐛᐸᑕᒡ ᐊᓂᔭ ᓇᔅᑲᐱ ᐊᔭᔭᑎᓂᒥᒋ ᐊᑯᓱᐅᓂᔪᐤ ᑭᔭ ᑲᒋᒥᔭᑲᓄᒡ ᐅᒋᒪᐅᒡ᙮ ᐊᓐᑕ ᐃᓯᐱᒧᑕᓄᒡ ᐊᑯᑕ ᐊᑐᔅᒐᐅᓐ ᒐᐛᐸᑕᑲᓄᒡ ᑭᔭ ᑐᐎᔅ ᒐᒋ ᔭᔭᑎᓇᒡ ᒐᒂᔪᐤ ᓇᔅᑲᐱ ᑭᔭ ᒥᓯᓇᐃᑭᓐᒋᐛᐸ ᑭᔭ ᑲᑐᔅᒐᓯᒡ ᑭᔭ ᐊᑐᔅᒐᐅᓐ ᐊᐱᒋᑕᐅᓇ᙮ ᒋᒋᐛ ᐊᔅᑕᐃᑕᒂᒡ ᐊᑯᑕ ᒐᓄᒂᒡ ᐊᑐᔅᒐᐅᓐ ᐊᔭᔭᑎᓇᑲᓄᒡ ᑭᔭ ᓇᔅᑲᐱ ᐊᔭᔭᑎᓐᑎᓱᒡ᙮
back to top
ᑕᑐᐎᒡ ᐅᒋᒪᐅᓐ ᒐᒋ ᔭᔭᑎᓐᑎᓱᒡ • Regional Self-government
ᓂᑲᓄᒡ ᒥᒐᑦ ᐱᐳᓇ ᒋᑕᐸᑕᑲᓄᒡ ᒐᒋ ᔭᔭᑎᓐᑎᓱᒡ ᓇᔅᑲᐱ ᐃᔪᒡ ᑭᔭ ᐊᑯᑕ ᐸᐃᑯᑕᐤ ᐛᐃᓯᐱᒧᑕᒡ ᒧᔭᒻ ᐃᔅᒋᒪᐛ ᑲᑐᑎᒥᒋ ᑲᑎᐸᐃᑎᓱᐃᒋ ᐊᓐᑕ ᒋᓴᐅᒋᒪᑲᓂᒡ ᑭᔭ ᑲᓇᒋᐱᔅᑐᐛᐃᒋ ᑯᐸᒃ ᑭᔭ ᐊᑐᐛ ᒋᓴᐅᒋᒪᑲᓇ᙮ ᐊᓐᒡ ᓇᔅᑲᐱ ᐊᓐᑐᐛᐃᑕᒡ ᒪᒧ ᒐᒋ ᓇᒋᐱᔅᑐᐛᑲᓄᒡ ᒐᒋ ᒋᒋᐛ ᐛᐸᑎᐛᒡ ᐊᓂᔭ ᐊᔅᒋᔪᐤ ᑎᐸᐃᑎᒧᐅᓂᔪᐤ ᐊᒋᑕᐸᑕᒡ᙮ ᐊᔅᒋᔾ ᑎᐸᐃᑎᒧᐅᓐ ᐊᑯᑕ ᐊᒋᑕᐸᑕᑲᓄᐃᒡ ᓇᔅᑲᐱ ᐅᑎᔅᒋᔭ ᑲᐸᒡ ᐃᑕᑦ ᑭᔭ ᐊᓐᑕ ᑲᐱᑲᔅᒋᑎᓱᑦ᙮
back to top