ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᓱᐛᐅᓐ • Cree-Naskapi (of Quebec) Act

 ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᐎᓱᐛᐅᓐ ᑲᐱᒧᑯᑕᒡ ᐊᓐᑕ ᒍᓐᐱᓯᒻ 14,1984 ᐊᑯᑕ ᐊᓐᒡ ᐊᑐᐛ ᒋᓴᐅᒋᒪᑲᓂᒡ ᐊᑲᔅᑕᐅᑯᒡ ᐊᓐᑕ ᐱᔅᑎᓯᓇᐃᑭᓂᒡ 7 ᓂᔄᐅᑕᒡ ᐊᓐᑕ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓯᓇᐃᑭᓂᒡ ᑭᔭ ᒐᒋ ᐱᒧᑯᑕᒡ ᒐᒋ ᐊᐱᒋᑕᒐ ᓇᔅᑲᐱ ᑎᐸᐃᒥᑎᓱᐅᓐ ᒋᓴᐅᒋᒪᑲᓂᒡ ᐃᑎᓱᐛᐅᓂᔪᐤ ᑭᔭ ᑯᑎᑲ ᒐᒂᐃᐛ ᐎᓱᐛᐅᓐ ᐊᑐᔅᑲᔅᑕᒃ᙮

• ᐊᑎᔅᑕᒡ ᐊᓐᒡ ᐃᔪᒋᒪᑲᓐᒡ ᐃᑎᓱᐛᐅᓇ ᐊᓐᑕ ᒥᒄ ᒐᐊᐱᒋᑕᑲᓄᐃᒋ ᐊᓐᑕ ᐸᐃᑯ ᐊᑎᔅᑕᒡ
ᐊᔅᒋᒡ IA-N Lands.
• ᑲᒋᒥᑕᑲᓄᒡ ᓇᔅᑲᐱ ᐊᓯᓂᑲᑕᑲᓄᒡ ᐊᑎᔅᑕᑲᓄᒡ ᑲᐃᓯᓂᑲᑕᑲᓄᒡ ᓇᔅᑲᐱ ᐅᑕ ᓴᐱᐸᐤ᙮ ᐊᓐᒡ
ᐃᔪᒋᒪᑲᓐᒡ ᑲᓄᐛᐃᑕᒡ ᓱᒋᔪᐅᓂᔪᐤ ᐊᑐᔅᒐᐅᓂᔪᐤ ᒐᒋ ᒋᒋᐱᐃᑕᒡ ᑭᔭ ᐊᑲ ᐅᒡ
ᑲᓄᐛᐃᑕᒡ ᐃᔪᒋᒪᑲᓐᒡ ᐊᓐᑕ ᑲᑕᒡ ᐊᔅᑯ ᐃᔪᐤ ᐎᓱᐛᐅᓂᒡ᙮
• ᐊᑎᔅᑕᒡ ᐊᐛᓐ ᓇᔅᑲᐱ ᒐᒋ ᐊᓯᔅᑎᒋᒪᑲᓄᑦ᙮
• ᑲᒋᒥᑕᑲᓄᒡ ᓱᒋᔪᐅᓐ ᑭᔭ ᐅᒋᒪᐅᓐ ᐊᓐᑕ ᐃᔪᒋᒪᑲᓂᒡ
• ᐊᓂᑲᐛᑲᓄᒡ ᐃᔪᒋᒪᑲᓐᒡ ᐊᑐᔅᒐᐅᓂᔪᐤ ᒐᒋ ᑐᑕᒡ ᐅᒋ ᑲᓂᐅᐱᑕᒡ᙮
• ᐊᓐᒡ ᐃᔪᒡ ᐊᑐᔅᑲᔅᑕᑯᒡ ᐊᓂᔭ ᐃᔪᒋᒪᑲᓇ ᑭᔭ ᐃᔪᒋᒪᑲᓐᒡ ᐅᑎᑐᔅᒐᐅᓄᐛᐤ ᒐᒋ ᐱᒻᐱᑕᒡ
ᑕᑈᒧᐅᓐ ᒥᓯᓇᐃᑭᓂᔪᐤ ᑭᔭ ᒪᑲ ᐃᑎᓱᐛᐅᓇ᙮
• ᒐᒋ ᒋᒥᑕᑲᓄᒡ ᑲᐃᔅ ᐱᒧᑕᓄᒡ ᐊᓐᑕ ᐃᔪᒋᒪᑲᓐᒡ ᐛᒋᒪᐃᒥᑥᐎᔾ᙮
• ᐊᑎᔅᑕᒡ ᐊᓐᒡ ᐃᔪᒋᒪᑲᓐᒡ ᒋᑲᒋᒋᒥᑕᐅᒡ ᑲᒪᒧᐎᓇᓄᐃᒋ ᐊᓐᑕ ᒐᐊᐱᒋᑕᒡ ᐃᑎᓱᐛᐅᓇ ᒥᔅᑯᒡ
ᐊᓂᔭ ᑲᒪᒧᐎᓇᓄᐃᒋ ᒥᒄ ᒋᑲᒋᐊᑐᔅᑲᔅᑎᒧᒡ ᐊᓂᔭ ᐃᔪᒋᒪᑲᓇ ᐅᑎᐸᐃᑎᒧᐅᓂᐛ᙮
• ᐊᐎᑕᑲᓄᒡ ᐊᐛᐃᐛ ᐊᑐᔅᑲᔅᑕᑯᒡ ᐃᔪᒋᒪᑲᓐᒡ [ᒧᔭᒻ ᑲᒥᓯᓇᐃᒐᔅᑦ]᙮
• ᒪᓯᓇᑕᑲᓄᐃᒋ ᑕᑎᐸᓐ ᐃᑎᓱᐛᐅᓇ ᒐᒋ ᓂᔅᑯᒧᐅᒡ ᐃᔪᒋᒪᑲᓐᒡ ᐊᓐᑕ ᒐᒋ ᐊᑐᔅᑲᔅᑕᒡ᙮
• ᑲᒋᒥᑕᒡ ᑲᐃᔅ ᐱᒧᑕᓄᒡ ᒐᒋ ᓇᐊᐃᑕᑲᓄᒡ ᑭᔭ ᒐᒋ ᐱᒻᐱᑕᑲᓄᒡ ᑕᑈᒧᐅᓐ ᒥᓯᓇᐃᑭᓐ ᑭᔭ
ᐃᑎᓱᐛᐅᓇ ᔭᐱᒡ ᐊᔅᑎᒋᑕᑲᓄᒡ ᐊᓂᔅᑯᒧᒡ ᓇᔅᑲᐱ ᐃᔪᒡ᙮
• ᒐᒂᓐ ᒐᓄᑕᐱᐃᒡ ᒐᒋ ᒥᓯᓇᑕᐅᑎᓱᓇᓄᒡ᙮
• ᒐᐃᔅ ᓇᓴᐃᑲᓄᒡ ᒐᒋ ᐅᒋᒪᐃᒥᓇᓄᒡ ᑭᔭ ᒥᓯᓇᑕᐅᑎᓱᓇᓄᒡ ᒐᒋ ᓇᐊᐃᑕᑲᓄᒡ ᒐᒂᓐ᙮
• ᒐᒋ ᒋᒥᑕᑲᓄᒡ ᒐᐃᔅ ᓇᓴᐃᑲᓄᒡ ᓱᓇᔭᐤ ᐊᑎᑯᑕᒡ ᒐᐃᔅ ᐊᑐᔅᑲᔅᑕᑲᓄᒡ᙮
• ᐊᐎᑕᑲᓄᒡ ᐊᐛᓐ ᐊᓯᓇᑯᓂᒡ ᒐᒋ ᐱᒐᑦ ᑭᔭ ᒐᒋ ᐎᒋᑦ ᐊᓐᑕ ᐱᑎᓱ ᐸᐃᒄ ᐊᔅᒋᔪᐤ
ᐊᑎᔅᑕᐃᒡ IA-N Lands᙮
• ᐊᐛᓐ ᐊᑕᑈᑐᐛᑲᓄᑦ ᒐᒋ ᐊᐱᒋᑕᑦ ᐱᑎᓱ ᒐᒂᔪᐤ ᐊᑎᑯᓂᒡ ᐊᓐᑕ ᐸᐃᒄ ᐊᔅᒋᔪᐤ ᐊᑎᔅᑕᐃᒡ
IA-N Lands᙮
• ᐊᐎᑕᑲᓄᒡ ᑯᐸᒃ ᒋᓴᐅᒋᒪᐤ ᒐᒋ ᐅᑎᓇᒃ ᐊᓂᔭ ᐸᐃᒄ ᐊᔅᒋᔪᐤ ᐊᑎᔅᑕᐃᒡ IA-N Lands᙮
• ᐊᐎᑕᑲᓄᒡ ᐊᒋᑕᐸᑕᑲᓄᒡ ᐊᔅᒋᔾ ᑭᔭ ᒐᒂᓐ ᐎᒋᒥᑕᑲᓄᒡ ᐊᓇ ᐊᑐᔅᑲᔅᑕᒡ ᐃᔪᒋᒪᑲᓐᒡ᙮
• ᒐᒋ ᑐᑕᑲᓄᒡ ᑕᐊᓐ ᐊᓐᒡ ᐃᔪᒋᒪᑲᓐᒡ ᒐᐃᓯᐱᒧᑕᒡ ᑲᐤ ᐱᔅᒐ ᑭᔭ ᒪᑲ ᓄᑎᒻ ᐎᒥᔭᒡ ᑯᐸᒃ
ᒋᓴᐅᒋᒪᑲᓇ ᐊᓂᔭ ᐸᐃᒄ ᐊᑎᔅᑕᐃᒡ ᐊᔅᒋᔪᐤ IA-N Lands
• ᒐᒋ ᒋᒥᑕᒡ ᒐᐃᔅ ᐃᔅᐱᑕᑲᓄᐃᒡ ᒐᒋ ᒥᓯᓇᑕᐃᑲᓄᒡ ᒐᒂᓐ ᐊᔅᒋᒡ ᐛᐃᑕᐱᒋᑕᑲᓄᒡ ᑭᔭ
ᐎᒋᒥᑕᑲᓄᒡ ᒐᒂᓐ ᐊᓐᑕ ᐸᐃᒄ ᐊᑎᔅᑕᐃᒡ ᐊᔅᒋᔪᐤ IA-N Lands᙮
• ᐊᐎᑕᑲᓄᒡ ᑕᐊᓐ ᒐᐃᔅ ᐱᒧᑕᒡ ᐃᔪᒋᒪᑲᓐᒡ ᐎᐱᔅᑎᓇᒡ ᐊᔅᒋᔪᐤ ᑭᔭ ᒪᒃ ᐊᒋᒥᑕᒡ ᒐᒂᓐ ᐊᓐᑕ
ᐸᐃᒄ ᐊᑎᔅᑕᐃᒡ ᐊᔅᒋᔪᐤ IA-N Lands
• ᒐᒋ ᒋᒥᑕᑲᓄᒡ ᐊᓇ ᒋᒥᔅ ᐱ ᑭᔭ ᓇᔅᑲᐱ [ᐅᑕ ᑯᐸᒃ] ᑲᒪᒧᐎᑐᓇᓄᒡ ᑭᔭ ᒐᒋ ᐎᑕᑲᓄᐃᒡ
ᐊᓯᓇᑯᓂᒡ ᐅᑎᑐᔅᒐᐅᓄᐛᐤ᙮
• ᒐᒋ ᒋᒥᑕᑲᓄᒡ ᒐᐃᔅ ᐱᒧᑕᓄᒡ ᑕᐊᓐ ᒐᐃᔅ ᐊᓱᐱᔅᑎᓇᑲᓄᐃᒡ ᓇᔅᑲᐱ ᐃᔪᐤ ᐅᑎᐸᐃᑎᒧᐅᓐ
ᐊᐳᓂᐱᒪᑎᓯᑦ᙮
• ᐊᐎᑕᑲᓄᒡ ᐊᐛᓐᒋ ᐊᓐᒡ ᒐᐊᑲ ᐅᑎᓇᑲᓄᐃᒡ ᑕᑭᔅ ᑭᔭ ᓱᓇᔭᐤ ᐊᑐᑕᑲᓄᒡ ᑕᑭᔅ ᐊᓐᑕ ᑕᑐᐎᒡ
ᐊᒋᑕᐸᑕᑲᓄᒡ ᒐᒂᓐ᙮
• ᐊᓐᑕ ᒐᒂᓐ ᐊᒋᒥᑕᑲᓄᒡ ᐅᑎᐸᐃᑎᒧᓄᐛᐤ ᐃᔪᒋᒪᑲᓐᒡ ᑭᔭ ᓇᔅᑲᐱ ᐊᓐᑕ ᐸᐃᒄ ᐊᑎᔅᑕᐃᒡ
ᐊᔅᒋᔪᐤ IA-N Lands ᒐᐊᑲ ᓇᓴᐛᑲᓄᒡ ᑕᑭᔅ ᑭᔭ ᒪᑲ ᒐᒋ ᒪᑯᓇᑲᓄᐃᒡ; ᑭᔭ
• ᐊᐎᑕᑲᓄᒡ ᐱᔅᒐ ᓱᒋᔪᐅᓐ ᐊᑎᒂᒡ ᐊᒋᑕᐸᑕᑲᓄᒡ ᑲᒪᑯᓄᐛᓯᔪᐤ ᐊᑐᔅᒐᐅᓐ ᑭᔭ ᐊᑐᔅᑲᔅᑕᑲᓄᒡ
ᑎᐸᔅᑯᒐᐅᓐ᙮

ᑐᐎᔅ ᐃᒧᐅᓐ ᐊᑎᒂᒡ ᐊᐛᐎᑕᑲᓄᒡ ᐅᐛ ᐎᓱᐛᐅᓐ [ᒥᑯ ᐊᑲᑭᔭᓴᐅᔅᑕᒡ]

back to top

ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ • James Bay and Northern Quebec Agreement (JBNQA)

ᐊᓐ NEQA ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᑲᒥᓯᓇᑕᐅᑎᓱᓇᓄᒡ ᓴᓯᑲᓐ ᑲᒋ ᓂᓱᑈᒡ ᑲᒋ ᒥᓯᓇᑕᐅᑎᓱᓇᓄᒡ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ᙮ ᐊᓇ ᑲᐎᑐᑕᑲᓄᒡ ᒐᒋ ᐸᐃᑯᑕᐤ ᐃᓯᐱᒻᐱᔭᑲᓄᒡ ᓇᔅᑲᐱ ᒧᔭᒻ ᐊᓐᑕ ᐊᓯᐱᒻᐱᔭᑲᓄᒡ ᒋᒥᔅ ᐱ ᑭᔭ ᐃᔅᒋᒪᐅᒡ ᐊᓐᑕ ᒋᒥᔅ ᐱ ᒋᐛᑎᓄᒡ ᑯᐸᒃ ᓂᔅᑯᒧᐅᓂᒡ ᐊᓐᑕ 1975 ᐱᐳᓐ ᑲᐃᑎᔅᑕᒡ᙮
ᐃᓯᓇᑯᓐ ᐊᑲ ᐱᔅᒐ ᓂᔅᑐᐛᐸᑕᑲᓄᐃᒡ ᐅᑎᐸᐃᑎᒧᐅᓄᐛᐤ ᓇᔅᑲᐱ ᑭᔭ ᐊᑲ ᐊᔭᑎᔅᑕᑲᓄᒡ ᑎᐸᐃᑎᒧᐅᓐ ᐊᓐᑕ ᒋᒥᔅ ᐱ ᑭᔭ ᐃᔅᒋᒪᐅᒡ ᐊᓐᑕ ᑯᐸᒃ ᐊᓐᑕ ᒪᓯᓇᑕᐃᑲᓄᒡ ᒋᒥᔅ ᐱ ᓂᔅᑯᒧᐅᓯᓇᐃᑭᓂᒡ᙮ ᐊᓐ ᒋᒥᔅ ᐱ ᓂᔅᑯᒧᐅᓐ ᐸᐃᒄ ᐊᑎᓯᓇᑕᐃᑲᓄᒡ ᐊᓐᑕ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓂᒡ ᐸᐃᑯᑕᐤ ᒋᒥᓯᓇᑕᐅᑎᓱᓇᓄᐤ ᐊᓐᑕ ᔭᐱᒡ ᑲᒥᓯᓇᑕᐅᑎᓱᓇᓄᒡ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ᙮ ᐊᓐ ᑲᔭᑎᔅᑕᑲᓄᒡ ᐊᑭᔅᑭᑎᔅᑕᒡ 22 ᑭᔭ 23 ᐊᓐᑕ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓂᒡ ᑭᔭ ᐊᓐᑕ ᐊᒋᑕᐸᑕᑲᓄᒡ ᐛᔅᑲ ᐊᔅᒋᔭ ᑭᔭ ᓂᑲᓄᒡ ᐊᑐᔅᒐᐅᓐ ᒐᒋ ᒋᒥᑕᑲᓄᒡ᙮ ᔭᐱᒡ ᑲᔭᑎᔅᑕᑲᓄᒡ ᐊᑭᔅᑭᑎᔅᑕᒡ 24 ᐊᓐᑕ ᒋᒥᔅ ᐱ ᓂᔅᑯᒧᐅᓂᒡ ᓇᔅᑲᐱ ᒐᒋ ᓂᔅᑐᐛᐸᑕᑲᓄᐃᒡ ᓄᑎᒻ ᐊᓯᓐᑐᐅᓇᓄᐃᒡ ᑭᔭ ᑕᑐᐎᒡ ᐊᓐᑕ ᒐᒋ ᐛᐸᑎᐛᓄᒡ ᑎᐸᐃᑎᒧᐅᓐ ᒐᒋ ᐊᐱᒋᑕᑲᓄᒡ ᐊᓐᑕ ᒋᐛᑎᓄᒡ ᑯᐸᒃ᙮ ᒪᔅᑕᔾ ᑲᐊᑎᔅᑕᑲᓄᒡ ᐊᑭᔅᑭᑎᔅᑕᒡ 1 ᐊᑎᔅᑕᒡ ᐊᓐᑕ ᒋᒥᔅ ᐱ ᓂᔅᑯᒧᐅᓂᒡ ᒐᒋ ᒥᔅᑯᑎᓇᑲᓄᒡ ᑭᔭ ᒐᒋ ᐊᓱᔅᑕᑲᓄᒡ ᐱᔅᒐ ᐃᒧᐅᓐ ᐊᔅᒋᔄᒪᑲᒡ᙮
ᑐᐎᔅ ᐃᒧᐅᓐ ᐊᑎᒂᒡ ᐊᐛᐎᑕᑲᓄᒡ ᐅᐛ ᒋᒥᔅ ᐱ ᑭᔭ ᒋᐛᑎᓄᒡ ᑯᐸᒃ ᓂᔅᑯᒧᐅᓐ
[ᒥᑯ ᐊᑲᑭᔭᓴᐅᔅᑕᒡ]

back to top

ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ • Northeastern Quebec Agreement (NEQA)

ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ NEQA ᐊᒋᑕᐸᑕᑲᓄᒡ ᐊᔅᒋᔾ ᑎᐸᐃᑎᒧᐅᓐ ᑲᑐᔅᑲᔅᑕᒡ ᐊᓐᒡ ᓇᔅᑲᐱ ᑭᔭ ᑯᐸᒃ ᒋᓴᐅᒋᒪᑲᓐ ᑭᔭ ᒋᒥᔅ ᐱ ᓂᒥᔅᒋᐅᔅᑯᑕᐤ ᐊᑐᔅᒐᐅᓐ ᑭᔭ ᒋᒥᔅ ᐱ ᐊᑐᔅᒐᐅᓐ ᐊᒋᑕᐸᑕᑲᓄᒡ ᑭᔭ ᓂᒥᔅᒋᐅᔅᑯᑕᐤ ᑯᐸᒃ ᑭᔭ GCCQ ᑭᔭ NQIA ᑭᔭ ᐊᑐᐛ ᒋᓴᐅᒋᒪᑲᓐ ᐊᓐᑕ ᐅᒐᒥᑐᓇᓂᐱᓯᒺ 31,1978 ᑭᔭ ᐊᑕᑎᓂᒋ ᓂᓱᔪᐤ ᐊᑭᔅᑭᑎᔅᑕᐃᒋ ᑕᑐᐎᒡ ᐊᓐᑕ ᒐᒂᓐ ᐎᔭᐎᑕᑲᓄᒡ᙮

• ᐊᑭᔅᑭᑎᔅᑕᒡ 1 ᐊᔅᒋᔄᓄᐅᒡ
• ᐊᑭᔅᑭᑎᔅᑕᒡ 2 ᓂᔅᑎᒻ ᐊᓯᒥᔪᐛᓄᒡ ᓂᔅᑯᒧᐅᓂᒡ
• ᐊᑭᔅᑭᑎᔅᑕᒡ 3 ᓇᔅᑲᐱ ᒪᓯᓇᑕᐛᑲᓄᒡ ᓂᔅᑯᒧᐅᓯᓇᐃᑭᓂᒡ
• ᐊᑭᔅᑭᑎᔅᑕᒡ 4 ᐊᔅᒋᔾ ᐊᐛᐎᑕᑲᓄᒡ
• ᐊᑭᔅᑭᑎᔅᑕᒡ 5 ᐊᔅᒋᔾ ᐊᓯᑎᐸᐃᑲᓄᒡ
• ᐊᑭᔅᑭᑎᔅᑕᒡ 6 ᐊᐃᔅ ᐊᐃᒧᑕᒡ ᐅᔅᑯᑎᒻ ᑭᔭ ᐊᔅᒋ ᐊᓯᐱᑯᓂᑲᓄᒡ ᑭᔭ ᑯᑎᒡ ᐊᓯᐎᔅᑕᑲᓄᒡ
• ᐊᑭᔅᑭᑎᔅᑕᒡ 7 ᐱᑐᒋᓴᐅᒋᒪᐅ ᒐᑎᐸᐃᑕᒃ 1A-N ᑲᐃᑎᔅᑕᐃᒋ ᐊᔅᒋᔪᐤ
• ᐊᑭᔅᑭᑎᔅᑕᒡ 8 ᓇᔅᑲᐱ ᐃᑕᐅᓂᒡ ᑎᐸᐃᑎᒧᐅᓐ ᒐᑎᐱᐛᐅᓯᒡ 1B-N ᑲᐃᑎᔅᑕᐃᒋ ᐊᔅᒋᔪᐤ
• ᐊᑭᔅᑭᑎᔅᑕᒡ 9 ᒐᐃᔅ ᐊᔭᑎᔅᑕᑲᓄᒡ ᒥᓯᐛ ᓇᔅᑲᐱ ᓂᔅᑯᒧᐅᓐ
• ᐊᑭᔅᑭᑎᔅᑕᒡ 10 ᒥᔪᐱᒪᑎᓯᐅᓐ ᑭᔭ ᐃᔪᐅᓐ ᒐᒋᒥᔪᔅᑕᒡ ᐊᐃᔅ ᐱᔅᑎᓂᑲᓂᐅᒡ
• ᐊᑭᔅᑭᑎᔅᑕᒡ 11 ᔅᑯᑎᒪᒐᐅᓐ
• ᐊᑭᔅᑭᑎᔅᑕᒡ 12 ᐊᓯᐱᒻᐱᑕᑲᓄᐅᒡ ᑎᐸᔅᑯᓐᒐᐅᓐ
• ᐊᑭᔅᑭᑎᔅᑕᒡ 13 ᑲᒪᑯᓄᐛᓯᒡ
• ᐊᑭᔅᑭᑎᔅᑕᒡ 14 ᐊᔅᒋᔭ ᑭᔭ ᓂᑲᓄᒡ ᐊᑐᔅᒐᐅᓐ ᐛᒋᒥᑕᑲᓄᒡ
• ᐊᑭᔅᑭᑎᔅᑕᒡ 15 ᓂᑐᐎᐅᓐ ᐊᓄᑎᒪᓴᓄᒡ ᑭᔭ ᐊᓂᑐᒪᓂᓇᓄᒡ
• ᐊᑭᔅᑭᑎᔅᑕᒡ 16 ᓱᓇᔭᐤ ᐊᐱᑯᓯᓇᐃᒐᓄᒡ ᑭᔭ ᒐᐃᔅ ᐸᒂᓇᑲᓄᒡ ᑕᑭᔅ
• ᐊᑭᔅᑭᑎᔅᑕᒡ 17 ᓇᔅᑲᐱ ᐊᑕᑈᐅᒐᐃᑕᑯᓂᒋ ᐅᑎᐱᐛᐅᓯᐅᓄᐛᐛ
• ᐊᑭᔅᑭᑎᔅᑕᒡ 18 ᐃᔪᐅᓐ ᑭᔭ ᐱᑲᔅᒋᐃᑎᓱᐅᓐ ᐊᐎᑲᐳᐎᑕᑲᓄᐃᒡ
• ᐊᑭᔅᑭᑎᔅᑕᒡ 19 ᐊᓱᐛᐎᒋᐃᐛᓄᒡ ᐊᓂᑐᐎᐅᓇᓄᒡ ᐊᓄᑎᒪᓴᓄᒡ ᑭᔭ ᐊᓂᑐᒪᓂᓇᓄᒡ
• ᐊᑭᔅᑭᑎᔅᑕᒡ 20 ᐊᑎᐳᐅᓐ

ᐊᓇ ᐊᔅᒋᔾ ᑎᐸᐃᑎᒧᐅᓐ ᐛᑲᔅᑎᓇᑲᓄᒡ ᐊᓇ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᐊᓐᑕ ᐊᑎᓯᓇᑕᐃᑲᓄᒡ ᐊᑭᔅᑭᑎᔅᑕᒡ 35 ᐊᓐᑕ ᒋᓴᐅᒋᒪᑲᓂᒡ ᐅᑕ ᑲᓇᑕ ᐎᓱᐛᐅᓂᒡ 1982 ᐱᐳᓐ᙮ ᐊᓇ ᐊᔅᒋᔄᒪᑲᒡ NEQA ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ ᒐᐊᑲ ᐊᐱᒋᑕᑲᓄᐅᒡ ᐊᑐᐛ ᑭᔭ ᒪᑲ ᑲᓇᑕ ᑐᑕᒡ ᐊᓂᔭ ᐎᓱᐛᐅᓂᔪᐤ ᐊᓐᑕ ᒐᒋ ᒪᒪᓯᑕᒃ ᐊᓂᔭ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓂᒡ NEQA
ᑐᐎᔅ ᐃᒧᐅᓐ ᐊᑎᒂᒡ ᐊᐛᐎᑕᑲᓄᒡ ᐅᐛ NEQA ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ[ᒥᑯ ᐊᑲᑭᔭᓴᐅᔅᑕᒡ]

back to top

ᐎᔭᑎᔅᑕᑲᓄᒡ ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ • Northeastern Quebec Agreement Complementary Agreement (NEQACA)

ᒋᐛᑎᓄᓯᒡ ᑯᐸᒃ ᓂᔅᑯᒧᐅᓐ NEQA ᒋᑲᒋᔭᑎᔅᑕᑲᓄᐤ ᒥᒄ ᐊᓐᒡ ᒋᑭᐎᓂᔅᑯᒧᐅᒡ ᓇᔅᑲᐱ ᑭᔭ ᐊᓐᒡ ᑯᑎᑲᒡ ᑲᒥᓯᓇᑕᐅᑎᓱᒡ ᓂᔅᑯᒧᐅᓂᔪᐤ᙮
ᐱᓂᐎᐅᐱᓯᒻ 11,1993 ᐊᓇ ᓂᔅᑯᒧᐅᓐ ᐸᐃᒄ ᐊᑎᔅᑕᒡ ᑲᒥᓯᓇᑕᐅᑎᓱᓇᓄᒡ ᓂᔅᑯᒧᐅᓯᓇᐃᑭᓐ ᒐᒋ ᐊᔭᑎᔅᑕᑲᓄᒡ᙮ ᐊᓂᔅᑐᐛᐸᑕᑲᓄᒡ ᐊᓂᔭ ᐅᑎᐸᐃᑎᒧᐅᓄᐛᐤ ᓇᔅᑲᐱ ᒐᒋ ᐊᓐᑐᐅᒡ ᐊᐛᓯᓴ ᒐᒋ ᑕᐛᒐᒡ ᑭᔭ ᓂᑕᐅᒐᒡ᙮ ᐊᓐᑕ ᐊᓐᑐᐅᓇᓄᒡ ᒐᒋ ᑕᐛᒐᓄᒡ ᒧᔭᒻ ᐎᔭᔅ ᑭᔭ ᐎᓂᑕᐅᒐᑲᓄᒡ ᐊᐛᓯᓴᒡ ᐊᓐᑕ ᐸᐃᒄ ᐊᑎᔅᑕᒡ ᐊᔅᒋᔭ ᓂᑐᐛᐃᑕᑯᓐ ᒐᒋ ᓂᔅᑯᒧᐅᒡ ᐃᔪᒋᒪᑲᓐᒡ ᑭᔭ ᐊᓐᒡ ᐃᔪᒋᒪᑲᓐᒡ ᐎᐃᐛᐤ ᑲᓄᐛᐃᑕᒡ ᓱᒋᔪᐅᓂᔪᐤ ᒐᒋ ᐱᒻᐱᑕᒡ ᐃᑎᓱᐛᐅᓂᔪᐤ ᒐᒋ ᐛᑎᓱᑕᒡ ᐊᓂᔭ ᐎᑐᑕᑲᓄᐃᒐ᙮

ᓂᔅᑯᒧᐅᓐ ᐸᐃᒄ ᐊᑎᔅᑕᒡ [ᒥᑯ ᐊᑲᑭᔭᓴᐅᔅᑕᒡ] Complementary Agreement no. 1 (English Only)
ᓂᔅᑯᒧᐅᓐ ᐸᐃᑯᔪᐤ ᐊᑎᔅᑕᒡ [ᒥᑯ ᐊᑲᑭᔭᓴᐅᔅᑕᒡ] Complementary Agreement no. 10 (English Only)

back to top